I Firda 09.09.2011 tek ordførar Håkon Myrvang seg friheita å kritisere to av sine kanskje argaste konkurentar i ordførarkampen i Naustdal, Sp sin Viggo Leikanger og SV sin Ole Erik Thingnes(underteikna). I sin iver etter å undergrave sine meddebattantar, og politiske motstandarar tek han ufine middel i bruk. Det han kjem med her vekker ikkje “undring” hjå meg, det vekker oppsikt. Dette er direkte feilinformasjon, Illusjonisme på sitt verste.

Når det gjeld val av trassè for 420kv kraftline kan vi takke Naustdal Ap for at ikkje Naustdal har gått samla mot og krevd sjøkabel/kabling. Myrvang har gjennom heile prosessen argumentert og jobba FOR 420kv line gjennom Naustdal. Dette harmonerar dårleg med “illusjonisten” Håkon Myrvang sine påstandar, og no krav om kompensasjon.

Venstre meiner at eit velferdssamfunn målast etter korleis vi tek vare på dei svakaste. Vi arbeidar for at hjelpa skal ytast nærast mogleg den einskilde borgar og pasient, og at langt fleire helse- og omsorgstenester skal utførast lokalt.

Frå 2012 vil samhandlingsreforma gradvis innførast, og den vil leggje store oppgåver på kommunen når det gjeld førebygging og behandling. Venstre støttar innføringa av reforma, men ser også at ei redusering i tal på kommunar truleg bør følgje i kjølvatnet.

Naustdal Arbeidarparti vil fortsette å utbetre og utvikle vegnettet i kommunen. Etterslepet som har vore på dei kommunale vegane har minka, men det er viktig å fortsette med arbeidet og oppgraderinga av vegane vore. Vi vil jobbe mot samanknyting av kommunale vegar. Dette medfører enklare og tryggare skuleveg. Grendene vil bli samla og vi får auka trivsel i nærmiljøa. Gode vegar vil minke slitasjen på køyretøy og tidsbruken på transport blir redusert. Nye områder vil verte tilgjengeleg for busetnad og vi får lagt til rette for meir næringsareal i heile kommmunen.

Det er viktig for Naustdal Arbeidarparti at innbyggarane har eit stort og allsidig arbeidsområde. Vi jobbar aktivt for at 45 min. regionen skal bli størst mogeleg. Vi vil derfor ha kystvegen innom Naustdal med kryssing over Ålesundet og vidare til Redalen. Utbetring av RV 611 frå Redalen til Naustdal er særs viktig med tanke på industriprosjektet på Engebø.

Naustdal Senterparti meinar det no er svært viktig å få fornye den politiske leiinga i Naustdal kommune. Senterpartiet har fram for årets val lagt vekt på fornying og å sleppe ungdomen meir

til. Partilista har dermed den lågaste snittalderen av samtlege kommunevalister i Naustdal, med ein snittalder på 41 år. I tillegg har vi ei liste med god geografisk spreiing og fri for tette familieband.

Valkampen 2011 nærmar seg slutten. Politiske parti fokuserer på sine viktigaste saker og velgarane skal gjere sine val. Dei siste fire åra har Naustdal vore styrt etter tydelege prioriteringar, vi har gjort mange og vanskelege val som trase for sentralnettlina, mineralprosjektet på Engebø, skulestruktur, skuleopprusting, barnehageutbygging og starta vurdering av resurssituasjonen i dei store sektorane våre. Vi har no ei gjennomarbeidd økonomiplan der ein har oversyn over kommunen sine økonomiske størrelsar og oversyn over kva planarbeid og utviklingsarbeid som er relevant i kommunen. Vi har rutinar for å få fram driftsutfordringar i tenesteleddet i økonomiperioden som til dømes overskriding av lønsutgifter eller driftsutgifter. I tråd med godt budsjettarbeid har vi som kommune samanlikna drifta vår med samanliknbare kommunar. Vi har gjort vedtak for driftsnivået i tenesteleddene våre og vi har gjort grep for framtidig inntening slik at vi som kommune kan yte so gode velferdstilbod som muleg til innbyggarane våre.

Det er med undring eg på valsida i Firda, under tittelen “Kva vil dei kutte”, les Venstre sin ordførarkandidat i Naustdal si framstilling av økonomistyringa til sitjande politikarar. Venstre har laga ei oversikt over innsparingar i økonomiplanperioden og legg til grunn at vi må spare 36 millionar kroner fram til 2014. Det vert vidare hevda av Venstre sin ordførarkandidat at Venstre står for forutsigbar politikk og forutsigbar økonomistyring.

Onsdag 31. august var det møte om utviklinga av stamvegen E39 på Sunnfjord Hotell i Førde. Listetoppane til dei partia som i dag er representert på fylkestinget var alle til stades og sa kva dei ville gjere med E39. Av dei partia som var representert i panelet var Framstegspartiet det einaste partiet som sa eit klart og tydleg nei til å mure inne Førde med bomstasjonar. Dette vil bety at naustedøler som jobbar i Førde vil måtte betale tusenvis av kroner i ekstra avgifter. Som om ikkje det er nok vil desse pengane mest truleg gå til å finansiere ein tunnel frå Langeland til Krongborg/Bruland. Dette vil vere ein veg som dei færraste naustedøler vil nytte. Med andre ord; Vi vil bli tvinga til å betale for ein tunnel som vi nesten aldri vil bruke.

Naustdal FrP er det einaste partiet i Naustdal som har programfesta motstand mot bompengar. Vi vil gjere alt vi kan for å forhindre at Naustdal kommune gjer si støtte til bompengar, slik at regjeringa ikkje kan seie at bompengar har støtte lokalt. I tillegg er Sogn og Fjordane FrP det einaste partiet som seier heilt klart nei til bompengar på E39. Vi vil gjerne ha vegen, men å sende rekninga til billistar som ikkje ein gang nyttar vegen kan ikkje ein gong kallast brukarfinansiering. I dag vert berre ein brøkdel av inntektene som staten tek inn i bilrelaterte avgifter nytta til vegføremål, det er difor heilt feil å tvinge billistane til å betale for vegen endå ein gong. I alle fall billistar som ikkje ein gong kjem til å nytte vegen.

Viser til oppslaget i Firda, torsdag 1. sept, og ønskjer å komme med ei oppsummering og nokre kommentarar til dei ulike partia sine syn i skulesaka.

For Naustdal Venstre er det ikkje eit poeng, i seg sjølv, å legge ned skular. Vi ser mange faglige argument for både små skular og skular nærast mogleg heimen. Politikk handlar imidlertid om korleis ein skal nytte kommunen sine avgrensa ressursar på best mogleg måte. Venstre meinar då at det beste for både elevane og kommunen som heilheilt er ei skikkelig satsing på Naustdal Barne- og Ungdomsskule (NBU). Denne satsinga vil vi finansiere ved å overflytte elevane frå Dalen.

Naustdal Venstre ønskjer opne politiske prosessar, forutsigbar lokalpolitikk og ei ansvarleg økonomisk styring av kommunen.

I budsjettet for inneverande år er det lagt opp til å nytte 2,6 mill i oppsparte midlar samt at det er lagt til grunn 3,3 mill i innsparing i drifta. Fylkesmannen har også påpeika at inntektene er vurdert 0,5 mill for høgt pr år for heile økonomiplanperioden som går til 2014.

Regjeringa si målsetjing for kulturskuletilbodet er eit ”kulturskuletilbod av god kvalitet til ein rimeleg pris, for alle barn som ønskjer det”. Opplæringslova slær fast at ”alle kommunar skal, åleine eller i samarbeid med andre kommunar, ha eit kulturskuletilbod til barn og unge, organisert i tilknyting til skuleverket og kulturlivet elles”. Det er vidare etablert ei felles forståing for utviklinga av kulturskulane som lokale ressurssenter, og at det er eit lokalt ansvar å legge til rette for gjennomføringa av dei overordna føringane.

Torsdag 11. august var representantar for alle partia i Naustdal samla for å drøfte valkampopplegget. Det vart då samrøystes vedteke at det skulle vere debatt i Vevring 6.september

Torsdag 25. august hadde Naustdal Høgre besøk av 1. nestleiar i Høgre/stortingsrepresentant Jan Tore Sanner og fylkesordførarkandidat Noralv Distad. Under besøket vitja dei blant anna det nye byggefeltet som er under planlegging / oppbygging ved Sæla samt at dei tok vegprosjektet Naustdal – Sæla nærare i augesyn.

Først vil vi gratulere Naustdal Kommune med eit positivt kommunestyrevedtak i den mykje omtala “Engebøsaka”. Mineralprosjektet på Engebø vil gje kommunen mange ettertrakta og sårt trengte arbeidsplasser. Arbeid og muligheit for å finne arbeid der ein bur er avgjerande for vekst og utvikling i ein kommune. Folketalsvekst og inntekter gjer at det blir skapt verdiar som i neste omgang gjer at kommunen får meir å dele. I dette ligger økonomisk handlefridom til å yte betre velferdstilbod til innbyggarane samtidig som kommunen får handlingsrom til investeringar.

Vi har forståing for at mineralprosjektet har skapt engasjement. Usikkerheit og spørsmål som nokon har hatt om kva som skjer med bygda, fjorden og miljøet, har medført at det har blitt gjort fleire utgreiingar og det har vorte gjeve svar på spørsmål.

Naustdal er ein kunst- og kulturkommune av rang. Vevringsutstillinga, Slettemark ART, Sandensøndag, Luftkampmuseet, Sommarfesten på Årøyane og i Vevring, Kunst på tvers, samt fleire andre arrangement i løpet av året. Her er det endelause mogelegheiter til å bygge eit nettverk og merkevare vi kan marknadsføre kommunen med.

Kommunen har i inneverande kommunestyreperiode tilsett kulturkonsulent i 50% stilling, denne vil SV auke til 100% stilling av fleire grunnar. Skal ein kunne rekruttere til slike stillingar, og halde på tilsette er deltidsstillingar ikkje det rette verkemiddelet. Naustdal SV vil at kommunen skal bygge på det arbeidet friviljuge driv, og vere ein samarbeidspart for å utvikle dette til å verte ein berekraftig del av kommunens utviklingsarbeid. Kunst og kultur er viktige samfunnsbyggande funksjonar, og Naustdal er i ei særstilling med mange etablerte kunstnarar og kulturarrangement. Kommunen har ikkje satsa nok på og å skape næringsutvikling innan denne sektoren, det vil vi gjere noko med.

Naustdal er ein tradisjonell landbrukskommune, men har som mange andre vestlandskommunar dei siste åra hatt ein kraftig nedgang, spesielt i tal mjølkeprodusentar. Tal landbrukseigedomar i drift i Naustdal har og hatt ei negativ utvikling. Dette har føljer for tilboda til dei som framleis driv. Kulturlandskap forfell som ein konsekvens av nedgang i beitedrift, samstundes som dyrkamark gror att og får konsekvensar for bu og driveplikt. Landbruket har dei siste åra opplevd stadig nye regelendringar og krav til kvalitet, produksjon og utstyr. Stønadssystem og tilskotsordningar til nyinvesteringar og ombyggingar har ikkje vore tilstrekkeleg til at småbruka på vestlandet har klart dei store omstillingane. Busetting og utvikling i distrikta har historisk sett hatt nær tilknyting til primærnæringane landbruk og sjøbruk. Skal Naustdal auke busettinga i bygdene, treng vi ei satsing som aukar dei økonomiske rammene, men ikkje minst interessa for å drive desse bruka.

Attåtnæring til landbruk er eit nyttig verkty for å sikre eit økonomisk grunnlag for drift av småbruk i distrikta. Nokre viktige områder som Naustdal har gode føresetnader for å dra nytte av er reiseliv og opplevingsbaserte næringar. Vi har t.d Nausta som nasjonalt laksevassdrag, Førdefjorden som nasjonal laksefjord, landskapsverneområdet Naustdal-Gjengedal og mindre verne områder over heile kommunen. I tillegg har Naustdal ein fantastisk langstrakt geografi som strekk seg frå fjell til hav. Naustdal har store nasjonale og internasjonale natur og miljøkvalitetar, noko vi kan bygge merkevare på.

Engebøsaka vert den største saka i Naustdal si framtid, uavhengig om ein er for eller mot deponi eller andre delar/konsekvensar av prosjektet, uavhengig av om MD/Regjering går for eller mot reguleringsplanen. Å basere valkampen på at denne saka no er ute av Naustdal sin kontroll, og at ein dermed ikkje treng ta stilling til Engebø i valkampen er vel i beste fall naivt. Dei fleste vedtak med monalege økonomiske konsekvensar i Naustdal i inneverande periode har Engebø som ein faktor i større eller mindre grad. Engebø var ikkje tema under dei 2 førre val rundene heller(lokalval og stortingsval), sjølv om SV gjorde det vi kunne for å få partia på bana. Vi skuldar innbyggarane å ta denne saka seriøst, og det har SV framleis tenkt å gjere.

Når fornuften sigrar, og MD/Regjering returnerar saka til Naustdal(konsekvensen av at t.d Fjordeponi ikkje får tilsagn, mangelfull ku, feil i politisk sakshandsaming m.m), har Naustdal kommune fått attende makta(ref: tidlegare diskusjonar om makt i forhandlingar). Gjeve att so skjer, kva har partia som stiller lister i Naustdal tenkt å nytte denne makta til i komande periode? Skal politikarane i Naustdal atter ein gong legge seg flat for Nordic Mining å late dei styre prosessen? Om Naustdal atter sit med makta er det avgjerande at kommunestyret i Naustdal er skikka til å køyre ein skikkeleg prosess, slik det skulle vore gjort frå starten.

I 2006 var Naustdal blant dei kommunane i Sogn og Fjordane som hadde størst nedgang i folketalet.

At vi som kommune ikkje har vekst i folketalet er uheldig fordi dette har innverknad på overføringar frå staten og på inntekter til kommunen.

Naustdal Arbeidarparti sin skulepolitikk

Naustdal skal vere ein trygg og god stad å vekse opp i og vi skal ha ein skule med sterk fokus på innhald og kvalitet. Vi skal ha tidsriktige og gode læremidlar i skulen, fokus på ernæring, fysisk aktivitet og folkehelse. Vi ønskjer levande bygder og eit sterkt sentrum, dugnadsinnsatsen og engasjementet i grendene er beundringsverdige og vi ønskjer å vere med på å la kommunen vekse. For oss er mangfaldet viktig, det er like viktig for oss med tilflytting i Vevring og i dalen som i sentrum, og då er skulen ein viktig medfaktor om ein ønskjer å busetje seg i grendene.

Sogn og fjordane Sosialistisk Venstreparti forventar at Miljøverndepartementet føretek synfaring på Engebø i Naustdal kommune i samband med handsaming av Nordic Mining sitt forslag til reguleringsplan for mineralutvinning. Saka har grunna motsegn frå Fiskeridirektoratet fått ei anna handsaming enn vanleg, og ligg no til endeleg handsaming hjå MD.

Denne saka har enorme dimensjonar men er ikkje godt lokalpolitisk handverk. Lovlegkontroll og klager på vedtak fyljer i fotspora. Samstundes vil eit positivt vedtak skape presedens for nye mineralprosjekt langs heile kysten av Noreg. Etter at dei involverte kommunane gjorde vedtak har fleire andre liknande prosjekt på vestlandet kome fram, endå fleire ligg på vent. Ei samla miljørørsle saman med ei samla fiskeri og havbruksnæring går mot prosjektet. Store verdiar er på spel.

Naustdal Venstre har som høgaste prioritet å arbeide for å utvikle Naustdal i retning av å bli den mest attraktive bukommunen i Sunnfjord.

I lys av dei offensive planane for tilrettelegging til bustadbygging som er gjort av kommuneadministrasjonen, meinar Naustdal Venstre det er på høg tid å stake ut kursen i forhold til korleis ein ønskjer at opplæringstilbodet i kommunen skal sjå ut i framtida.

Har du ikkje fått med deg kva Naustdal Venstre står for, anna enn at vi vil arbeide for eit utbygging av Naustdal Barne- og Ungdomsskule og tale miljø og lokalsamfunna si sak ved ei utbygging av Engebø?

Meir informasjon kan du få her:

Samfunnsdemokratane vil kjøpe tilbake fylkesbåtane, og få flagget til topps igjen!

Kreftene og arbeidsstyrken vår må nyttast til verdiskaping og gode tenester i Sogn og Fjordane.